Yeni Klinika ilə bağlı ŞOK: İşçilərin maaşını banka qoyub, faiz götürlər?

Xəbər verdiyimiz kimi, "Yeni Klinika"da çalışan bir qrup tibb işçisi əmək haqlarının ödənilməsində yaranmış ciddi gecikmələr barədə müraciət edib.

Tibb heyətinin NOCOMMENT.az redaksiyasına verdiyi məlumata görə, klinikada çalışan həkimlərin və digər personalın maaşlarının ödənilməsi artıq 14 gündür ki, heç bir rəsmi izahat verilmədən gecikdirilir. Bu vəziyyət gündəlik fəaliyyətini yüksək risk altında davam etdirən tibb işçilərinin sosial rifahına mənfi təsir göstərməklə yanaşı, kollektiv daxilində ciddi narazılığa və suallara yol açıb. Redaksiyamıza daxil olan müraciətdə bildirilir ki, maliyyə öhdəliklərinin vaxtında yerinə yetirilməməsi işçilərin bank öhdəlikləri və digər zəruri xərcləri qarşısında onları çətin vəziyyətdə qoyub.

Məsələnin ən düşündürücü tərəfi isə bu böyüklükdə səhiyyə müəssisəsinin aylıq əməkhaqqı fondunun taleyi ilə bağlıdır. İddia olunur ki, işçilərin əməkhaqqı və bonuslarının bilərəkdən gecikdirilməsi maliyyə manipulyasiyası məqsədi daşıya bilər. Belə ki, minlərlə işçisi olan və aylıq maaş fondu yüz minlərlə manatla ölçülən bir qurumun vəsaitlərinin bank hesablarında cəmi 14 gün belə saxlanılması, həmin vəsait üzərindən ciddi faiz gəlirlərinin əldə edilməsinə şərait yaradır. TƏBİB və klinika rəhbərliyi tərəfindən heç bir rəsmi izahatın verilməməsi isə "bu vəsaitlər hansı bankda və kimlərin marağı üçün dövriyyədə saxlanılır?" sualını aktuallaşdırır. Əməkhaqqı büdcəsi böyük olan müəssisələrdə yarım aylıq gecikmə zamanı yaranan "faiz qazancı" işçilərin haqqı olduğu halda, bu məbləğin hansısa şəxsi və ya qeyri-rəsmi korporativ maraqlara xidmət etməsi ehtimalı ciddi narahatlıq doğurur.

Məsələ ilə bağlı NOCOMMENT.az-a danışan hüquqşünas və bank eksperti Əkrəm Həsənov qeyd edib ki, əməkhaqqının əsassız yerə gecikdirilməsi həm Əmək Məcəlləsinin, həm də maliyyə intizamının kobud şəkildə pozulmasıdır: "İri dövlət müəssisələrində və publik hüquqi şəxslərdə vəsaitlər xəzinədarlıqdan və ya müvafiq büdcədən ayrıldıqdan sonra onların bir neçə həftə ərzində işçilərin kartlarına köçürülməməsi ciddi suallar doğurur. Əgər bir müəssisənin aylıq fondu yüz minlərlə manat təşkil edirsə, bu vəsaitin bank hesablarında 'gecəlik' (overnight) və ya qısamüddətli depozit şəklində saxlanılması kifayət qədər böyük faiz gəlirləri deməkdir. Bu, faktiki olaraq tibb işçilərinin haqqı olan pulun üzərindən qanunsuz yollarla gəlir əldə etmək cəhdidir və maliyyə cinayəti elementlərini ehtiva edə bilər".

Onun sözlərinə görə, bu cür hallar adətən idarəetmədə şəffaflığın olmadığı qurumlarda baş verir: "Qanunvericilik birmənalı şəkildə müəyyən edir ki, əməkhaqqı ödənilmədiyi hər bir gün üçün işəgötürən işçiyə orta aylıq əməkhaqqının müəyyən faizi qədər kompensasiya ödəməlidir. Lakin reallıqda biz bunun əksini görürük; rəhbərlik vəsaiti banklarda dövriyyəyə buraxaraq qeyri-rəsmi qazanc əldə edir, həkimlər isə kartlarındakı kredit borclarının faizləri altında boğulurlar. TƏBİB-in və müvafiq nəzarət qurumlarının bu məsələdə susması isə məsuliyyəti birbaşa rəhbərliyin üzərinə qoyur. Tibb işçisi 14 gün pulsuz fəaliyyət göstərirsə, bu həm də həmin şəxslərin iş motivasiyasını və xidmət keyfiyyətini aşağı salan fundamental bir problemdir. Bu vəsaitlərin hansı banklarda, hansı şərtlərlə və kimlərin təlimatı ilə gözlədildiyi mütləq şəkildə hüquqi müstəvidə araşdırılmalıdır".