İcra başçısı həbs edildi, müğənni faktları açdı: “Bu hərəkəti ona bağışlamadım”

2025-06-22 , 13:59

“Bir müddət öncə Qaxın icra başçısı Musa Şəkiliyev şəhid ailəsi olan qonşumuz, polkovnik Sadiq Məmmədovun ailəsinə qarşı hörmətsizlik etmişdi. Həmin anda özümü saxlaya bilməyib, emosional davrandım və bununla bağlı sosial şəbəkə hesabımda paylaşım etdim”.

Bu sözləri Globalinfo.az-a müğənni Vüqar Muradov Qax Rayon İcra Hakimiyyətinin başçısı Musa Şəkiliyevin saxlanılması ilə bağlı danışarkən deyib.
O, Musa Şəkiliyev haqda çoxlu sayda şikayətlərin olduğunu bildirib:
“Birmənalı olaraq deyirəm: kim olursa-olsun, belə bir vəziyyətdə heç kim özünü saxlaya bilməzdi. Feysbukda paylaşım edərək yazdım ki, sən mənim şəhidimə, onun ailəsinə hörmətsizlik edə bilməzsən! Bu balaca rayonda şəhidinə, qazisinə, onların ailəsinə hörmətsizlik edən şəxs vəzifəyə layiq deyil. Əksinə, o ailələrin qayğısına qalmalı, diqqətli olmalısan. Bu paylaşımım yayıldıqdan sonra, bildiyim qədərilə, məsələ artıq yuxarı səviyyədə həll olundu. Həmin şəhid ailəsinə torpaq ayrıldı, yaşayış şəraiti yaradıldı. Mən bu barədə sonra eşitdim və sevindim. Əsas şikayətim də məhz şəhid ailəsinə edilən hörmətsizliklə bağlı idi”.
V.Muradov deyib ki, Qaxda yaşamasa da, bu hadisəyə laqeyd qala bilməyib:
“Məsələ şəhidə hörmətsizlikdirsə, bu mənim üçün qırmızı xətdir. Kim olur-olsun – öz doğma atam belə şəhid ailəsinə hörmətsizlik etsəydi, onu da bağışlamazdım. O insan ömrünün 25-30 ilini hərbiyə həsr etmişdi. Gözünü açandan bu sahədə idi, Cəmşid Naxçıvanski adına Hərbi Məktəbinin yetirməsi, vətənpərvər bir insan olub. Onun ailəsinə qarşı edilən hörmətsizliyi eşidəndə çox ağır sarsıntı keçirdim”.
Müğənninin sözlərinə görə, icra başçısının etməli olduğunu onun qohumu Əhməd Əhmədzadə və oğlu yerinə yetirib:
“Əhməd müəllim bizim ağsaqqalımızdır. Məsələyə də o müdaxilə etdi. Onun oğlu Cuma Əhmədzadə xaricdə yaşasa da, qaxlıların sevdiyi, hörmət etdiyi bir insandır. Deyilənə görə, həmin problemi şəxsən o həll etmişdi, hətta şəhid ailəsinə ev də tikilmişdi”.
İfaçı sabiq başçının kobud biri olduğunu vurğulayıb:
“Çoxlu sayda insan mənə zəng etdi, şikayətləndi ki, o şəxs onlara da kobudluq edib, incidib, hörmətsiz yanaşıb. Mən Musa Şəkiliyev haqqında pis demirəm, amma kobud idi. Bir daha deyirəm – mənim üçün şəhid və onun ailəsi toxunulmazdır! Şəhidlərimiz bu vətən uğrunda, Azərbaycan uğrunda canını veribsə, onun hansı millətə, hansı irqə mənsub olmasının fərqi yoxdur! O artıq bizim hamımızın şəhididir və heç kim ona hörmətsizlik edə bilməz!”
Qeyd edək ki, Vüqar Muradov Vətən müharibəsində könüllü iştirak edib.
Xatırladaq ki, iyunun 20-də Qax rayonunun icra başçısı Musa Şəkiliyev, onun müavinləri və rayonun bir neçə vəzifəli şəxsi DTX-nın keçirdiyi əməliyyat zamanı saxlanılıb. Bundan sonra Prezident İlham Əliyevin imzaladığı sərəncama əsasən Musa Şaban oğlu Şəkiliyev Qax Rayon İcra Hakimiyyətinin başçısı vəzifəsindən azad edilib.
M.Şəkiliyev barəsində həbs qətimkan tədbiri seçilib.

Redaksiya ilə əlaqə: (+994) 50 295 94 79 | [email protected]