“Epşteyn faylları”nda adı çəkilən Azərbaycan şirkəti ilə bağlı ŞOK FAKTLAR

Bütün dünyanı silkələyən “Epşteyn faylları”nda bir Azərbaycan şirkətinin də adı hallanır. Bu, “AzPod”dur.

“Yeni Sabah” sözügedən şirkətlə bağlı bir sıra maraqlı faktları üzə çıxarıb:
Şirkətin təsis sənədləri qapalı olduğundan onun əsl sahibinin kim olduğu bəlli deyil. Amma ehtimallara əsasən, bu şəxs keçmiş nəqliyyat nazirinin oğlu Anar Məmmədovdur.
Açıq mənbələrdə “Azpod” MMC-nin adı müxtəlif vaxtlarda bir sıra məhkəmə şikayətləri və vergi borcu ilə hallanıb. Məsələn, 2015-ci ildə “AzSığorta” “AZPOD” şirkətini məhkəməyə verib. 2 saylı Bakı İnzibati-İqtisadi Məhkəməsinə müraciət edən ASC zərərin əvəzinin ödənilməsi barədə tələb irəli sürüb.
Məhkəmə iddianı qismən təmin edib. Qərardan narazı qalan "Azpod" MMC apellyasiya şikayəti verib. Həmin il sentyabrın 18-də Bakı Apellyasiya Məhkəməsində “AZPOD” Məhdud Məsuliyyətli Cəmiyyətinin (MMC) “AzSığorta” Açıq Səhmdar Cəmiyyətinə (ASC) qarşı apellyasiya şikayəti üzrə məhkəmə işi başa çatıb. Birinci instansiya məhkəməsinin çıxardığı qətnamə dəyişdirilmədən saxlanılıb.
2017-ci il martın 25-də keçmiş nəqliyyat naziri Ziya Məmmədovun oğlu Anar Məmmədovun Bakıdakı bir neçə daşınmaz əmlakının üzərinə həbs qoyulub. Həm də “Paşa Bank” ASC-nin iddiası əsasında.
Məhkəmədə “Garant İnşaat Sənaye” MMC, “Garant Holding” MMC, “Azpod” MMC və Anar Məmmədovun şəxsən özü cavabdeh tərəf olub.
Onlara məxsus bir neçə əmlaka, o cümlədən Nərimanov rayonundakı əmlak kompleksi, qeyri-yaşayış binası və Anar Məmmədovun şəxsi mülkiyyətindəki Məmməd Araz küçəsi, 25V, giriş 5 ünvanında yerləşən 9 saylı qeyri-yaşayış sahəsi həbs qoyub. Həmin əmlakların bağışlanması, satılması, məhv və istismar edilməsi cavabdehlərə və digər şəxslərə qadağan edilib.
“PAŞA Bank” ASC cavabdehlər – “Garant İnşaat Sənaye” MMC-yə (əvvəlki “Azbentonit” sement və tikinti qatqıları zavodu), “Garant Holding” MMC-yə, “Azpod” MMC-yə və Anar Məmmədovun özünə qarşı qarşı iddiada söhbət 1 milyon 141 min 203 manat 17 qəpikdən gedirdi. Bu, bankdan götürülən kredit, kredit faizləri və hesablanmış cərimənin toplam məbləğidi idi. Bank məhkəmədən borcun ipoteka predmetinə yönəldilməsinini də tələb edirdi.
Hər iki məhkəmə prosesində adı çəkilən "Azpod" şirkətinin 4 il öncə bir qrup ABŞ konqresmeninin Bakıya səfərinin təşkilinə qatıldığı iddia olunurdu. Turan İnformasiya Agentliyi 2014-cü ilin yanvarında Vaşinqtondakı rəsmi mənbələrə istinadla xəbər vermişdi ki, "Humpty Dumpty Institute" qrupu və "Azpod" MMC noyabrda konqresmenlərin səfərinə 40 min dollara yaxın pul xərcləyib. Həmin illərdə Anar Məmmədovun təsisçisi olduğu Azərbaycan Amerika Alyansı ABŞ-də lobbiçiliklə məşğul idi. 2015-ci ilin yayında - Azərbaycanda iqtisadi böhranın dərinləşdiyi və neft pullarının azaldığı bir zamanda təşkilat fəaliyyətini dayandırdığını elan etmişdi.
2018-ci il iyunun 2-də Göyçay rayonu ərazisində baş vermiş güclü leysan zamanı Bakı-Şamaxı-Yevlax yolunun 217-ci kilometrində Göyçay çayı üzərində yerləşən körpü qum-çınqıl yataqlarında aparılan qanunsuz istismar işləri səbəbindən uçaraq yararsız vəziyyətə düşmüş, nəticədə dövlətə 3 milyon manatdan artıq ziyan dəymişdi. Həmin il bununla əlaqədar Prezident İlham Əliyevin tapşırığına əsasən ayrı-ayrı şəhər və rayonlarda fəaliyyət göstərən 250-yə yaxın qum-çınqıl karxanasından 81-də monitorinq aparılıb. Monitorinqlərdə çoxlu pozuntular aşkarlanıb.
Aşkarlanmış qanunsuzluqlarla bağlı toplanılmış materiallar əsasında Baş Prokurorluqda Cinayət Məcəlləsinin 192-ci (qanunsuz sahibkarlıq), 255-ci (yerin təkinin qorunması və istifadəsi qaydalarını pozma) və 308-ci (vəzifə səlahiyyətlərindən sui-istifadə) maddələri ilə cinayət işləri başlanılmış, eləcə də hüquq mühafizə orqanlarının təcrübəli əməkdaşlarından və aidiyyəti dövlət qurumlarının mütəxəssislərindən ibarət istintaq-əməliyyat qrupları yaradılaraq təxirəsalınmaz tədbirlər həyata keçirilib.
Hüquqazidd əməllərə yol verdiklərinə görə “ATF” MMC-nin təsisçisi və faktiki rəhbəri Fəxrəddin Muradov, “Azpod” MMC-nin qum-çınqıl zavodunun direktoru Nəcməddin Əliyev, “Elnicat” MMC-nin direktoru Bəhruz Sadayev, “Titanik-5” MMC-nin təsisçisi və faktiki rəhbəri Şahin Məmmədov, fiziki şəxslər Natiq Zakirov, Nazim Qasımov, Nəriman Yəhyayev Cinayət Məcəlləsinin müxtəlif maddələri ilə təqsirləndirilən şəxs qismində cəlb edilərək məhkəmənin qərarı ilə barələrində həbs qətiimkan tədbiri seçilib.
2023-cü ildə Azərbaycanda 10-a yaxın şirkətin baş direktoru və təsisçisi olan şəxs 3 milyon manata yaxın vergi borcu olduğuna görə həbs edilib. Mətbuatda yer alan xəbərə görə, Saatlı rayon sakini, 1964-cü il təvəllüdlü Seymur İsmayılov Bakı şəhəri Lokal Gəlirlər Baş İdarəsinə 2.821.686,30 manat vergi borcu olduğu üçün Cinayət Məcəlləsinin 213.3-cü maddəsində nəzərdə tutulmuş cinayət əməlini törətməkdə təqsirli bilinib və 5 il 6 ay müddətinə azadlıqdan məhrumetmə cəzası məhkum olunub.
O, bir sıra şirkətlərlə yanaşı "Trans Azpod" və "Konstruktor Test" MMC-lərin qanuni təmsilçisi olub. Seymur İsmayılovun rəhbəri olduğu "Trans Azpod" MMC-nin 336 min 488 manat vergi borcu var.