“Biz o iclasda iştirak etməyəcəyik!” - QALMAQAL

Sabah Azərbaycan Kinematoqrafçılar İttifaqında (AKİ) yeni sədr seçiləcək və artıq bununla bağlı indidən qalmaqal yaranıb.

 
Yaranmış qalmaqal ilə bağlı Xalq artisti, kinorejissor-aktyor Şeyx Əbdül Mahmudov danışıb:
 
“Sabah “kolxoz” iclasıdır. Onlar sabah sanki kolxoz sədri seçəcəklər. Əli İsa Cabbarov kino xadimlərinin istəyinin əksinə olaraq qanunsuz şəkildə bir dəstə elektorant düzəldib, kinoya aidiyyəti olmayan oynayanları, oxuyanları başına yığıb özü üçün qurultay keçirmək istəyir. Bu, nə qurultaydır, nə də konfrans - bu, sadəcə bir yığıncaqdır. Əli İsa Cabbarov Azərbaycan kinosunun başının bəlasına çevrilib. Bu adam nə əməkdar artistdir, nə də əməkdar mədəniyyət işçisi. Vaxtilə Rüstəm İbrahimbəyovun dövründə “Milli Şura”nın üzvü olub, sonradan milyonerlər cəmiyyətində yer alıb və indi də situasiyadan sui-istifadə edərək belə bir addım atmağa çalışır. Özündən “sədr” düzəldib, Rasim Balayevin xəstə olmasından dörd ay istifadə edib, bütün sənədləri dəyişib”.
 
Xalq artistinin iddiasına əsasən, Hesablama Palatası dörd gündür ki, Kinematoqrafçılar İttifaqında yoxlama aparır və çox ciddi qanun pozuntuları aşkarlanır:
 
“Əli İsa Cabbarov tələm-tələsik saman çöpündən yapışaraq sədr olmaq istəyir. Amma başa düşmür ki, Allah eləməmiş, əgər sədr seçilərsə və ittifaqda cinayət işi açılsa, bütün bu qərarlar ləğv olunacaq, özü də çıxıb gedəcək.
 
Çox qəribədir ki, Azərbaycan kino korifeyləri kənarda qalıb, o isə hamını müxtəlif yollarla uzaqlaşdırıb. Mən Azərbaycan Kinematoqrafçılar İttifaqının 1966-cı ildən üzvü olan bir ağsaqqal kimi deyirəm ki, sabahkı toplantı qeyri-qanunidir. Hesablama Palatası yoxlama apardığı halda necə toplantı keçirilə bilər? Ədliyyə Nazirliyinə də müraciət olunub və nümayəndələrinin ora gələcəyi gözlənilir. O isə tələm-tələsik belə bir yola əl atır ki, bəlkə canını bu yolla xilas etsin. Amma bu mümkün deyil. Əgər cinayət sübuta yetirilərsə, cəzası qaçılmaz olacaq. Ona görə də kinonun adı ilə alver etməsinlər. Xalq artisti Şəfiqə Məmmədova daxil olmaqla, ciddi etiraz var. Rasim Balayev xəstə olduğu dövrdə Əli İsa Cabbarova etibar edib, möhürü və sənədləri ona verib. O isə bu etimaddan sui-istifadə edib. Başdan-ayağa rüsvayçılıqdır. Adam utanır ki, kino adına belə hadisələr yaşanır. Çox qəribədir ki, Rasim Balayev ona etimad göstərib, Şəfiqə xanım isə abırını qoruyub kənara çəkilib. Bu, çox böyük qanun pozuntusudur və biz də buna rəsmi etirazımızı bildirmişik. Həmin “konfrans” baş tutmayacaq. Biz orada iştirak etməyəcəyik”.
 
Musavat.com