Sumqayıtda tikintidən şikayət: "Göydən armatur yağır, daş tökülür"

Sumqayıt şəhərində çoxmərtəbəli yaşayış binalarının tikintisi ətrafda yaşayan sakinlərin narazılığına səbəb olub.

Məlumatıta görə, söhbət 15-ci məhəllə ərazisində, 1 saylı ASAN xidmət mərkəzinin arxası, Avtovağzalla üzbəüz yerləşən 46/9 saylı 9 mərtəbəli binanın qarşısında aparılan tikinti işlərindən gedir.

Həmin binada yaşayan sakinlər bildiriblər ki, sözügedən ünvanda icra olunan "Sumqayıt bağları" yaşayış kompleksi layihəsi çərçivəsində üç ədəd 16 mərtəbəli binanın səs-küylü inşası vətəndaşların ictimai asayişini və rahatlığını tamamilə pozub.

İddiaya görə, gecə saatlarında da davam edən tikinti prosesində işçilər yüksək səslə iş görür, kran və ağırtonnajlı yük avtomobillərinin səs-küyü insanları yatmağa qoymur.

Hətta, tikinti sahəsində elementar təhlükəsizlik tədbirlərinin görülmədiyi də iddia edilir:

"Göydən armatur yağır, daş tökülür. Hər hansı bir təhlükəsizlik tədbiri görülməyib. Bu isə birbaşa binada yaşayanların həyatına təhlükədir. Heç kim öz evində rahat və təhlükəsiz yaşaya bilmir", – deyə vəziyyətdən narazı sakin bildirib.

Bununla yanaşı tikinti işləri zamanı 9 mərtəbəli binanın həyətinin zəbt edilməsi sakinləri parklanma problemi ilə də üz-üzə qoyub.

Vətəndaşlar məsələ ilə bağlı aidiyyəti dövlət qurumlarına rəsmi şəkildə müraciət etdiklərini desələr də, tikinti şirkəti mövcud qanunauyğunsuzluqlara və şikayətlərə məhəl qoymadan fəaliyyətini eyni tempdə davam etdirir.

Mənbə: Patrul.az